Un Judio, La Prostata i La Aktualida

Un Judio, La Prostata i La Aktualida.

(Monologo)
(En ladino)
Jacques Farji Abulafia
Buenos Aires
Enero 2003.-

Aze unos anyos, 1962 el suscrito tenya, vamos aver 33 anyos, salvando las distancias, la edad del apogeo de la sabidurya de Shelomo Amelej, i por rasones de trabajo atendya a un cobrador – José (69)- i un dya viene a rendir cuentas, i en esto me lo kedo myrando i lo veygo kayido. Le demando ¿ Kualo tyenes José?. ¿Ke te esta pazando?.

Avras de saber, empezo diziendo, ke por mi eda esto pedryendo mi plenytu seksual. Mira, José, le dishe , en supito vate de aki deretcho al mediko, buhsca ke sea urologo, ke son los ke se entienden en esto, ke te myre. No te prekupes ke solo una koza no tyene areglo en la vida. Si me respondyo kon los ojos myrando al piso. Povereto pensi.

Komo en todo, kuando uno esta fuerte no pensa ke alguna vez esto mizmo le va a pasar i a él. Solo kuando la persona se aze aedado, rezien se arekodra “kuando veas las barvas de tu vecino arapar, mete las tuyas a remojar”.

Agora verash, pasaron entre una koza i otra 15 dyas i entra a la oficyna: ¿Ken? ... ¡si! El bueno de José, agora eufóriko, kon una sonrysa de oreja a oreja . Ni korto ni perezoso, enseguida lo interpely: ¿ke tal José? . Mui byen.... mui byen, repetía kontente. ¡komo jue? Insistí.

Entonzes se eksplayo, el rofe me dyo unas inyiksiones de..... komo ez..... ¡ah si! Se yaman totesterona. ¡ i ¿ le inkiry, :”esto un muchacho otra ves”.Me alegro le kontesty. Ansi ke kon otra sonrysa saludo i se jue. Era realmente otro onvre.

Dompues de unos otros 15 dyas, vuelve José por su lavoro de las kovransas, arrastrándose, mui, de mui amargado. ¡ke te pasa José? . Nada ke me va a pazar, la salyva por la garganta, ke las inyiksiones ya no me asen efekto. Son syn jaire ni birikyet.

La vedra, ke ya me imaginy al verlo. Tenya ke azer algo. Yo no savya byen ¿ke?. Ansi ke repentynamente le dishe : mira tomate 10 dyas, desha todo i vate kon tu mujer, de vakasyones, a una playa, kon sol, kon otro klyma; el agua , la mar, el ayre zuelen zer eksytantes. Abasho la kavesa, me avraso i se jue él i su alma.


36La cavesa del onvre es komo una cassette, ai se enjuntan los rekodros i memorise, ke alguna ves, lei ke el onvre entra en estas etapas de prekupasyones ze torna inestable i pasta yaga a avlarle a su menvro, se pone i de rodiyas, i le implora ke no lo aberguenze, ke no lo avandone, ya ke es savido lo ke es esto para su autoestyma, i ke naturalemente se komporte komo debe de zer.

Ma devo agregar ke a José no le jue byen i kreygo ke dismynuido, dejo de venir, en primero kon menos frekuensya. Dompues ni yo ni dingunos lo vymos mas.

Verash, komo estamos en aziendo i buscando rekodros, aze unos 3 o 4 anyos, estuvo kon grande suceso una ovra teatral “ Los Monologos de la Vagina”.

Tan maknyfiko je el eksyto ke kon elenkos diferentes se la azia simultáneamente en civdades distintas, I entonzes, a los apegados, aze una anyo surjio otra, del sekso opuesto: “ Rekodros del Pene”.

Ya lo se, no me lo digas, pareze maskaralic, pero los tyempos pazan. En mi chikez jui testigo de komo mi Abuela Paterna Sarah –en Ganeden este- dava vuelta su kara solo kon ke le komentaran ke en el sine mudo, la pareja aktoral se besava en la boka.

Ansi ke en volviendo a la aktualida no serya oy, tan deskaveyado, ke auscultemos , en supito, a la próstata, ke no tyene importansya poka., ya ke aparese komo el jues de su
Seksualidad.

Todo komenzo, komo para pensar, kuando “ Bojor jue al banyo i se kedo un anyo” . Rosha prekupada por la tardanza, estando kon su ijo regalado Daviko es ansi ke le disho: va aver a tu padre ke se enkasho al jus i no ay salyr. No zea ke le dyo un vayido, un desmayo, o algo, no kera el Dyo, ke El sea el guadrador, mira ke no lo esto vyendo byen.

El ijo enseguida jue, agolpeo la puerta con respekto –era su padre- ma no le respondyo, La sigunda ves golpeo mas juerte, kon markada prepkupasyon ke se trasuntava en las dadas, y resyen entonzes Bojor le espeto: ¡Aj! Ya va, ... ya va... ijo....
Me esto aliviando. El aya es lo uniko ke me mancaba.

Al salyr por fyn Bojor, Daviko le demando: Baba....¡ke le paza?. Nada ijo, Es la eda. Tengo un poko de ardor.

En el ínterin, para kitarlo un poko al padre de su dert, Daviko rekodro un cuento grasyozo del inefable Yoja –nuestro folklotyco personaje- i le disho, kon respekto Baba, me viene a la kavesa akel cuento de un dya de Shabat en ke Yoja estava en el valkon de su kaza echando una larga pishada- no olvidemos ke el aun se estava aziendose grande, era algo bodoke, i en esto diviza ke vuelven del Kaal el Padre, El Rabino y la parea de Judios, entonces Yoja korta súbitamente la miksyon.

37Dompues ke entro el padre, ya se avia despedido de todos sus akompanyantes, lo yama a Yoja y lo felicita: “¡Yoja veo ke te esta viniendo el meoyo, yasha, bravo!” , ¿Porke me dize esto Papa?. “Porke mos vites volviendo del Kaal i kortates la pishada”, i claro Papa ke se kree, bobo ze yo,,,,,,, i si me toma de la pishada i me tira abasho?.-

Pazo un poko el momento, Daviko estuvo byen, lo desvasho al Padre del momento ke pasava. Entraron al comedor onde estava la madre i Rosha ke es sietmesyna le enrostro a Bojor_ ¿otra ves de esto en esto? . Daviko, ke se veia venir la friksyon, entre sus progenitores, puzo panyos fryos a la situación i le musito tiernamente a Rosha ke no lo kudryara, para no oírlo kafrar, ke lo konsyderara lo ke estava pazando, ya ke si no se sentya byen kon inyervos serya peor.

Rosha, ke era buena, lo komprendyo ensiguyda porke le disho: ya tyenes rason Daviko, lus de mis ojos. Lo mijor va a zer ke vayga al matasanos. Pero...... core...........averigua almas no sea ke lo mandemos a uno ke no apresta para nada, ke ni sierve i mo lo envarke,

Estavlesyeron puentes, por komentaryos de varyos lados le recomendaron al Dr. Abrameto, de los muestros, ay mas konfyansa.. Aúnke vos diré ke aze munchos anyos, aziendo el eskierlic, muestro autor cayo gravemente enfermo, fiebre alta i delirando, Por si por no yamaron al mediko de la famia, kuando el enfermo, en ese estado, se sentya aluzinado, komo kon pioyos, el rofe al escuchar esto se echo de las escaleras i todavya lo estan bushkando.. Bueno mosotros dezimos ke sobre la tiera avlamos i no sobre dingunos no.

Retomemos a Bojor, al otro dya a mal de su pezar, se emvanyo i se jue ande el mediko kon Rosha, ke preocupada no lo asoltava para nada.

En supito ke entraron, el galeno kon su mejor sonrysa –psykologo i el- los aresyvio , ya estava akavidado ke los recomendaba don Shemuel Silicaro al ke , oportunamente, el Dr. Abrameto i lo avya operado i estava en pye i kaminando.

Myentrastanto Bojor, en sylensio, kon pánico justificado, no dezia ni esta voka es mya. Rosha, ke es fasyl de enyervarse, se le ensendyo la sangre i le rekrymino a Bojor:
Di Bojor, el mediko no es endivino ni estamos viniendo en el barko de Izmir, dile lo ke ke te esta pazando. ¡No avoltemos a pipino!. ¿Eh?.

No disho Bojor, en comenzando a desvashearse es ke .....tengo ardor. Al verlo tan difuso Rosha estayo: Ke ardor ni ardor, dile ke no puedes pishar, ¿o no es ansi?.

Bueno mujer, no me aturdas, ya tengo bastante i kon mi jal para ke te tomes tu ensyma de my i me atudras el ver i el oir, porke syno ke te revise a ti i yo me vo a kaza.

38En vyendo las derivaciones , el profesional, kon experensya, le disho, dirigiéndose a Bojor: “Vea my amigo vaya detrás del vionvo i kitese la ropa i vístase la vata i venga a la camiya ke lo vo a revisar”.

Bojor le disho bashustone Rofe, izo todo , vyno prima ¿ke ve? Al arofe kon la mano enguantada i el dodo grande i kon luvrykante, pongase ansi..... no....no.... ansi, ¡aja! Byen....byen.... no aga de fuerza por favor no zea ke tengamos ke yamar a los bomberos.

I.... le izo ekeyo tan temido: takto. A bojor le nazio de alyentro y se arekodro de todos los parientes propios y del Mediko mientras eksklamava: A ke dinyni sykti. I anyadio a mi ke ni en mi chikez me pusieron un supusytorio..... i agora esto perder ansi el invykto.

Bueno..... bueno.... ya esta. Proklamo el Dr Abrameto, el tamien se sentya aliviado. Vistase, le mando.

I volvio Bojor, demudado la notche la esta. Rosha se salya de las kasiyas, sin animarse a demandar, kualo era lo ke le pasava a su espozo,

Entonces el Dr. Abrameto, kon suspenso de Histkoch, deskoryo el velo del misterio i
Disho: le vo a dar unas pastiyas i las va a tomar 30 dyas . Son dos dyferentes una a la manyana i otra para de notche. Es la mijor konvinasyon para kurar la próstata una le de la manyana kita la irritasyon i la de la notche es para normalizarla.

I agrego el Dr, Abrameto preguntándole a Bojor ¿i su eda ez? . Bojor le kontesto no se lo va a creer, solo 71. No parece ¿no?.

El Galeno para sus alientros se solazava pensando ; No, claro, parece más. Pero nauralmentre no lo disho i prounsyo el tradicional :”munchos i buenos, pasta los 100 i 20. Ma ni mal ni atchakes le vo a ordenar una ekografya de próstata i rinyones. No ay apuro me la trae kuando viene a los 30 dyas de tratamiento. Kedese trankuilo. Kreygo ke va andar todo byen. Resyen entones les ryo la kara a l matrimonyo.

Se despidieron, reengrasyando la atensyon mientras el galeno les arekodrava, por si las moshkas; En un mes lo espero por aki. ¿Eh?.

Estavan saliendo; Rosha no pudo kon su genio, se dyo vuelta y le demando al Dr Abrameto: I digame Dr. El – por Bojor- (para saber si aprestará para todo, komo antes) ¿Puede azer la vida normal?.

Si Syniora Donya Rosha, vayga trankuila. Komo syempre, kon zuluk por estas alturas de la parábola eksiystensial.

39Ella, Rosha, para sus alientros arogava; En peor jal del ke estamos ke no vengamos. Ke el dyo mire i se apyade. Bojor salyo kuayi sin avlar. No avia muncha gana. Ez ke kuando los anyos pazan uno se va aziendo mas i mas aprensyvo i se jueron , tomados del braso, para volver en 30 dyas asperando cuentas vuenas de los syelos.

Entretanto todos les estamos deseando i de korason: ¡saludosos y buenos!.(Ke el ke no bive de mis anyos ke biva i mil anyos).-







































40